Simbul Logo Pemkab Sumedang

Simbul atawa lambang Sumedang teh dijieun ku tim peneliti, ti Dewan Pemerintah Daerah (DPD) nyaeta Suparno, Moh. Sulaeman, Sutisnea, R.S. Sulaeman jeung R. Gumilar Prawiranegara  (penulis).

Tim peneliti dijejeran ku R. Mahar Martanagara (alm) hiji ahli simbul, anjeunna netepkeun yen simbul Sumedang teh "LINGGA" insun-medal. 

1. Lambang Sumedang teh ngandung palsifah jati diri manusa, panghandapna (mimiti lahir ka alam buana).
2. Nomer hijina, ngalambangkeun sumber tanaga magnetik anu dipiboga ku sakur manusa, nu aya dinu tangtungan manusa.
3. Nomer duana, tangga nu lobana lima, ngagambarkeun pancaindra (pangucap, pangrasa, paninggal, pangambeu jeung parunggu).
4. Nomer tiluna, tihang dalapan siki, kenca-katuhu, ngagambarkeun dimensi alam.
5. Nomer opatna, pasagi 4 ngagambarkeun Opat Kalima Pancer, atawa Sunda nu lima atawa Pancaniti.
6. Nomer limana, buleudan ngagambarkeun sajatining, nyaeta manusa nu geus ngahontal mari'fat, nu geus nyaho ka sajatianna.

Jalma nu milampah palasifah lambang ieu bakal miboga watek satria tandang tanding; ludeung teuneung taya katineung, pertentang taya karingrang; teu gedag kaanginan, moal murag buuk salembar; wisesa lir tiwikrama, bleg nambleg nandingan gunung; janggelek sajatining jisim, nu nyumput jeroning jirim; weruh sadurung winarah, waspada permana tinggal, sampurna pancaindra, hurip warasing isun, asal sia asal aing, ucap nyata kalimusada; raga nyawa teu miboga, anging keresaning nu Kawasa, hirup kaula sawawa, nya AING (Nu Maha Kawasa) sajatining manusa.

Tulisan dina segi 4 : "KITA SEKALIAN BERSAMA-SAMA UMATNJA TUHAN LAGI SEASAL DAN SETURUNAN KALAU DIPIMPIN OLEH JANG PALING SEMPURNA YANG BERHATI SUTJI DAN BIDJAKSANA AMAN TENTERAM KEADAAN NEGARA", dina kaayaan nagara urang kawas ayeuna kudu di Tafakuran

"Urang sadaya sami tunggal kawulanging Allah, saasal satedak keneh. Upami dikapalaan ku nu sampurna, wening galih sareng linuhung, ayem tengtrem sadayana".